قصه شقة المهندس

لمحت عينها متثبتة قصادها، فسألتها سبب وقفتها، ردت وهي بتشاور على حاجة في ارضية الشقة..

ـ بص كده يا شريف.

بصيت ماكانت بتشاور وبدأت فسحة الغرائب، ارضية الشقة مليانه تراب، وده عادي بحكم قفلتها من فترة على حسب كلام صاحبها، بس اللي مش عادي، وفي نفس الوقت بيعكس كلامه من النقيض للنقيض، ان التراب عليه أثار خطوات!.. خطوات رجلين حد جوه الشقة، اي حد مكانا وهيشوفها، هيعرف بسهولة ان دي رجلين حد كان موجود في الصالة من لحظات، مش زي ما قال مالك الشقة انها مقفولة من فترة، فضلت مراتي واقفة زي تمثال ابو الهول.. عينها متثبتة على الارض، ومناخيرها بتشم ابشع ريحة، فضلت متابع بعيني خط سير الاثار، لحد ما وصلت عند باب متوارب اخر الشقة، اتمشيت بخطوات محسوبة ناحيته، كل خوفي لايكون في حد جوه الشقة، حرامي بقى ولا بلا ازرق.. وقتها ما ضمنش العواقب عليا وعلى اولادي، وطبعا ده تخمين واحد مجنون، بس ماكنش عندي بديل غيره.. وصلت قصاد الباب اللي بتنتهي عنده الخطوات، بصيت لجوه ضلمة، شبه ضلمة سما اخر الشهر الهجري، مديت ايدي وزقيت الباب، زييق تزييقه خفيفه فهمت منها ان صواميل الباب عفا عليها الزمن، لو احلف ان سمعت من جوه خربشة ماحدش هيصدقني، صوت خربشة كيس او حاجة بلاستيك بتتحرك، من لحظات كُنت عامل فيها سبع الليل، في ثانية اتقلبت قطة مش قط، خرجت موبايلي من جيبي وشغلت الفلاش، اللي قصادي حمام.. اتنفست بعمق لدرجة ان الريحة اللي خارجة منه، عششت في كل ركن من اركان القفص الصدري، وبحركة سريعة مديت ايدي نورت لمبة الحمام، لفيت بعيني.. فهمت ان الصوت اللي سمعته كان جاي من ستارة البانيو، ورجاء يا جماعة ماحدش يسألني مين حركها.. عشان انا وقتها ولدلوقتي اعتبرتها تهيؤات عقلي، بسبب الخوف او القلق.. ايا كانت الاسباب قولت تهيؤات وخلصنا، خاصة انه كان فاضي مافيش لا قط اتسرب من بلكونة مثلا، او حيوان زاحف دخل من شباك منور العمارة.. تصدقوا يومها عشان اطمن مراتي عملت ايه؟

وجه المهندس سؤاله للعمال اللي كانوا في حالة صمت تام، كلهم اتكلموا في نفس واحد..

ـ عملت ايه؟

رجعوا لحالة الصمت، اللي كان بيقطعه صوت المطر اللي عمال يخبط على ازاز الشباك، لحظات انتظار المهندس يكمل، وفعلا جاوب على سؤاله وسؤالهم..

كدبت عليها.. خرجت من الحمام وروحت عندها، وقفت قصادها وانا برسم على وشي ابتسامة..

ـ مافيش حاجة، دي خطوات رجلي لما دخلت الشقة، قبل ما انتي تنزلي من على السلم.

ده طبعا ماحصلش.. بس المضطر يركب الصعب، اما انا ابقي ماركبتش الصعب، انا اتقمصت دور ممثل شاطر في اداء دوره وبإتقان، لدرجة انها اتنهدت وضحكت.. الله اعلم وقتها صدقت كلامي، ولا حبت تقنع نفسها ان اللي بقول صح عشان الفسحة تكمل، المهم في الاخر النتيجة دخلت الشقة، من بعدها جم الولاد ودخلوا هم كمان، سيبتهم بيتفرجوا عليها، خرجت اجيب الشنطة اللي سيبتها مركونة على السلم، بدأت ادخلهم.. شنطة في التانية وعند التالتة اتخشبت مكاني، ده بعد ما سمعت صوت مراتي بتنده عليا وهي بتزعق، حدفت الشنطة في مدخل الصالة وجريت ناحيتها، كانت جوه الله يحرقه حمام الشقة، بتبص على قاعدة الحمام وعلى ملامحها الخوف، قربت منها وبصيت، اعاذكم الله كان في حد عامل حمام، ودي حاجة برضه غريبة، بتأكد شكوكي ان في حد هنا، او على الاقل كان في حد.. كلمت نفسي “اومال ايه اللي الشقة مقفولة، ومتهببة على دماغه، منك لله يا سيد”..

قطع سرحاني صوت مراتي..

ـ مش المفروض ان دي شقة مقفولة، اومال ايه ده؟

مستحيل طبعا اجاوبها زي المرة اللي فاتت واقولها انا، كده الممثل الشاطر هيتقلب كومبارس صامت وكداب كمان.. بس خدتها ع الحامي، ضحكت ضحكة متقطعة بتاعت واحد اهبل، مديت ايدي على السيفون وانا بقولها..

ـ يا شيخة انا قولت في مصيبة ولا حاجة، سايبة التراب والقرف ده كله، وجايه هنا تسألي في حاجات تقلب المعدة، اخرجي بس شوفي هتنضفي الشقة دي ازاي.

هزت راسها بالموافقة على كلامي، بدون اي كلام او رد فعل، خرجت وراها وشيلت ابني الصغير اللي مابطلش صراخ وعياط، خرجت بيه في البلكونة عشان يهدى، كانت بدأت مراتي في التنضيف وترتيب عفش الشقة، في خلال ساعة قدرت تنجز وتخلص.. كان واضح عليها التعب والاجهاد، فعتذرتلها اني السبب وكلها ايام ونروح شقة صاحبي، بس ردت وقالت..

ـ مافيش داعي نشيل ونحط تاني في الشنط، دفعنا ايجار الشقة وانا وضبتها، مش مستاهلة بقى نروح مكان تاني.

وافقت على كلامها وقفلنا الكلام في حوار الشقة التانية، بعدها طلبت منها تدخل ترتاح شوية، بس ده كان ضد رغبة ولادي، اللي فضلوا يتنططوا انهم عاوزين يروحوا البحر، الساعة كانت قربت على اذان العصر، برغم تعب مراتي وافقت، وده بعد عياط ابني الصغير زاد، فقالت..

ـ نوديهم شوية ولما ارجع ابقى ارتاح، حتى عشان “ايمن” يسكت، من ساعة ما وصلنا مابطلش عياط، وانت شايف الشقة ما فيهاش حتى مروحة، واضح كده انه حران وزهقان.

وافقتها.. طلبت منها انها تجهز الولاد عشان نخرج، بسرعة جهزتهم وخرجنا روحنا البحر، عدا وقت كان جميل جدا لحد ما الشمس غابت.. الولاد من التعب طلبوا انهم يرجعوا الشقة، خدناهم انا ومراتي ورجعنا بيهم، وصلنا قصادها وفتحت الباب.. عشان اتقابل بحاجة جديدة، اول ما فتحت نور الصالة، شهقت مراتي بصوت عالي، بصيت في الصالة وبعدها سألت..

ـ انتي ماقفلتيش البلكونة ولا الشبابيك؟

ردت عليا وهي مبرقة عينها..

ـ والله قفلاهم بأيدي قبل ما نخرج.

ماردتش عليها ورجعت لفيت وشي ناحية الصالة، اللي كانت شبه مقلوبة، المفارش كلها على الارض، المخدات الصغيرة محدوفة في كل اركان الصالة، حاجات كتير متنتورة في كل حتة، كالعادة لازم انقاذ الموقف، الحق ادور على اي مبرر، اتكلمت وقولت..

ـ اكيد هوا البحر فتح البلكونة والشبابيك، موجة البحر بتعمل تيار هوا شديد، واكيد ده اللي قلب الشقة بالشكل ده.

خلصت كلامي معاها، ماعلقتش.. اكتفت بنظرات عدم اقتناع وعوجت بوقها على جنب، لفيت وشي الناحية التانية واتكلمت في سري “يخرب بيت الكدب، الحكاية دي مالهاش اخر”.. اللي عرفته بعد كده إنها كانت لسه بتبتدي، ساعتها بصيت على مراتي اللي كانت مشغولة في جمع اشلاء الشقة، روحت عند الولاد اللي كانوا بيلعبوا، بعكس اللي كان واخد العياط مقاولة من وقت ما دخلنا العمارة، اصغر ولادي.. لما شيلته عشان اسكته، لاحظت إنه بيبص في اتجاه واحد، عينه رايحة ناحية امه اللي كانت داخلة الحمام، رفع ايده وهو بيصرخ وشاور عليها، ماكنش قصادي غير اني انده عليها تيجي تاخده، فعلا لما ندهت عليها سابت اللي كانت بتعمله وجت، وقفت قصادنا عشان تشيل الولد، بس هو كانت لسه نظرات عينه رايحة ناحية الحمام، كلمته وانا بديه لأمه..

ـ بتبص على ايه؟.. ما امك اهي جت عشان تاخدك.

كان مستمر في عياطه ومشاورته ناحية الحمام، مراتي مااهتمتش باللي بيحصل مع الولد، عشان كان تفكيرها إن اكيد سبب عياطه من الحر والرطوبة العالية، للسبب ده قالت..

ـ انا هروح الحمام احميه هو واخواته، عشان اغسل هدومهم من ماية البحر.

شاورتلها تقعد ترتاح شوية وتحاول تهديه، اكون انا خدت دش بسرعة عشان ادخل انام، وفعلا وافقت.. قعدت جنب الولاد مع محاولات انها تسكت ايمن، سيبتهم وروحت الحمام اخد دش، بعد ما قفلت الباب ودخلت البانيو، فتحت ماية الدش عشان اظبطها، بس انا اللي اتظبط.. بمجرد ما نزلت تحته، الماية اللي كانت من ثانية باردة عادية، اتقلبت لماية نازلة من على البوتاجاز حالا، كانت بتغلي.. من شدة سخونتها الحمام نفسه حرارته عليت، المايه عملت شبورة وغيمة خلتني مش شايف حاجة، حاولت اقفل حنفية الماية، بس كانت بتلف معايا ع الفاضي، وقتها سمعت صوت تزييقة باب الحمام بيتفتح، اول تخمين طبعا ان اللي دخل مراتي، بس ماكنتش شايف غير خيال حد بيتحرك ناحيتي، بسبب شبورة الماية السخنة، مش متحقق من صورتها، اتكلمت وقولت..

ـ اقفلي بسرعة محبس الماية انا هتخنق.

بس ماحدش رد عليا، لفيت وشي الناحية التانية وحسست بأيدي على مكان المحبس، في اللحظة دي حسيت ان في ايد بتلمس كتفي، والحمام اتقلب لفرن.. من احساسي بالخنقة اتعصبت..

ـ افتحي بسرعة شباك الحمام.

صمت تام، عدت ثواني الماية اتظبطت حرارتها، خدت دش بسرعة، روحت ناحية الباب اللي كان مقفول زي ما قفلته.. مع اني سمعته بيتفتح، خرجت عندي مراتي وانا متعصب بسبب اللي عملته، بس لقيتها قاعدة في البلكونة وشايلة الولد، قربت منها وسألتها..

ـ انتي مش كنتي قاعدة مع الولاد؟.. اومال امتى قومتي من جنبهم؟

استغربت لسؤالي، بس ردت..

ـ بعد ما دخلت تاخد دش، الولد ماكنش راضي يسكت، فسيبت الولاد بيلعبوا ودخلت البلكونة، قولت يمكن يهدى ويبطل عياط، من وقتها وانا قاعدة مكاني.

لحظة ما خلصت كلامها، لفيت وشي ناحية الحمام، عدا قصدي اللحظات اللي عيشتها وحسيتها جواه، كل اللي كان بيدور في دماغي سؤال “مين اللي كان معايا جوه الحمام؟”.. بس للأسف سؤال بدون أي إجابات، قطع سرحاني صوت مراتي اللي لاحظت عليا ملامحي اللي اتغيرت..

ـ انت كويس يا شريف؟

هزيت راسي ورديت عليه بصوت مهزوز..

ـ ايوه انا تمام وزي الفل.

بس ساعتها لا كُنت تمام، ولا كُنت زي الفل.. كان بدأ القلق يتسرسب جوايا، زاد لما مراتي قالت..

ـ انا داخله الحمام اشطف الولاد من المايه المالحة.

قاطعت كلام المهندس وسألته..

ـ ما حكيتش لمراتك اللي حصل معاك، او حتى مافكرتش تسألها اذا كانت دخلت الحمام وقت ما كنت بتاخد دش؟

مد ايده ناحية نار الوابور عشان يدفيها، فركهم ببعض ورد عليا وهو بيبتسم..

ـ فعلا شر البلية ما يضحك، سكت طبعا خوفت اقولها حاجة من اللي حصلت، وفي كل الاحوال.. اللي كان لازم احكيه وسكت عنه، هي شافته بعينها.. بعد ما غيرت للولاد وخرجتهم بره الحمام، دخلوا على السراير يناموا.. اما انا فضلت احرق في سجاير وعيني ناحيته مستنيها تخرج، بس ما خرجتش.. عدت دقايق وسمعت صرخة عاليه خلتني اتنفضت في مكاني، كان صوت مراتي.. قومت بسرعة عشان اروح افهم في ايه، قبل ما ادخل.. باب الحمام اتفتح وطلعت منه بتجري لبره في الصالة، شعرها منعكش، على وشها خوف ماشوفتوش قبل كده، عيونها حمرا زايغة بتلف في كل ركن من اركان الصالة، قربت منها وحاولت اهديها عشان تفهمني، اتكلمت وهي بتهته وجسمها بيتنفض..

ـ بعد ما خرجت الولاد، جهزت الماية اللي هغسل فيها الهدوم، ولسه هبدأ سمعت صوت نفس معايا، حد كان بيتنفس بصوت عالي قريب من ودني، بصيت حواليا بس ماكنش في حاجة، في سري همست بالبسملة عشان اشيل مني الخوف، للحظة ما سميت لمبة الحمام فرقعت، نزلت على الارض حتت صغيرة، من الخضة صرخت وخرجت اجري من الحمام.

طبعا انا ماسكتش، فتحت شوال الحجج اللي مالهاش دخل بالمنطق، بس الكدب الابيض اوقات بينفع في يوم زي ده، لفيت ايدي على كتفها وقولت..

ـ ما تاخديش في بالك، ده اكيد صوت موج البحر لسه مأثر على ودانك، ما احنا برضه بقالنا فترة ماطلعناش مصيف، دلوقتي هاخد لمبة من اي اوضة واركبها في الحمام، لحد بس الصبح انزل اشتري واحدة جديدة، سيبي كل حاجة وادخلي نامي جنب الولد، قبل ما يصحى.

قبل ما ترد بالموافقة من عدمها، سمعنا صوت الولد على صرخة واحدة، جريت مراتي بسرعة على الأوضة وشالته، كنا محتارين في حاله اللي اتغير بدون سبب مقنع، وقتها قالت مراتي..

ـ مدام ايمن فاق واشتغل وصلة عياطه، روح ركبلي لمبة في الحمام وخده انزل بيه شوية، عشان يهدى وينام، اكون انا خلصت اللي هعمله.

بصيت في ساعتي اللي كانت عدت نص الليل، رفعت حاجبي في تردد، اوافق على كلامها او ارفضه، بس لما بصيت لحالة ابني اللي بيتشنج من شدة عياطه، هزيت راسي بالموافقة على طلبها، بررت لنفسي ان دلوقتي صيف والناس كلها صاحيه، فعلا روحت ركبت لمبة في الحمام، بعد ما خلصت خدت منها الولد، خدت المفاتيح وخرجت بره الشقة، والحال براها اسوء من جواها بمراحل، الدور الملعون كان ضلمة كحل، واضح من كلام البواب عن بخل صاحب الشقة، ماكفهوش حقه.. اتكلمت مع نفسي وانا واقف متخشب ” يا بخل اهلك، ده انت راجل معفن، ماهنش عليك تركب لمبة قصاد شقتك”.. زن ابني مع التوتر اللي كُنت في، حسيت ان الرطوبة هتخنقني، مديت ايدي في جيبي خرجت الموبايل، اي حاجة تنور اشوف بيها خطوة رجلي، نورت فلاش التليفون ونزلت اول درجة في السلم، الولد بدأ يهدى.. مع هدوئة سمعت صوت احتكاك جاي من تحت، نزلت درجة تانية وتالتة، معاهم عرفت ان صوت الاحتكاك ده جاي من الاسانسير، دي حاجة عادية.. اي حد من السكان راجع شقته، بس اللي مش عادي وبسببه وقفت على اكبر درجات السلم، الاسانسير وقف في الدور اللي في شقتي، ساعتها مخي رجع ساعات لورا وقت وقوفي مع البواب، سألت نفسي “ازاي وقف هنا؟.. اومال ايه الكلام اللي قاله البواب؟”.. ياريت الحال وقف لحد هنا، ده بعد ما وقف، الباب الحديد اللي عليه اتفتح، ثانية في التانية في التالتة، وانا واقف مكاني مستني المشهد الجديد، اللي كان في قفل باب الاسانسير ونزوله مرة تانية للدور الاول، فضلت واقف متابع نزوله، بصيت جواه.. اللمبة الصغيرة اللي جواه كانت بتتهز، بتترعش بدون ما تفصل، اللحظات البطيئة وانا بتابعه مرت كأنها ساعة، ده كفاية عشان اشوف ان جواه فراغ، مافيش حد نزل، واكيد مافيش حد طلع الدور عندي، في اللحظة دي سمعت صوت مراتي بتصرخ، من بعدها صوت فرقعة عالية وقوية.. بدون تفكير سندت ضهر ابني وطلعت الدرجات اللي نزلتها، خرجت المفاتيح اللي وقعت مني على الارض، ميلت جبتها وفتحت الباب بأيد بتترعش، عشان الاقي الشقة بنفس ضلمة السلم، الاضاءة الوحيدة اللي شوفت بيها كانت في الحمام.. مراتي كانت واقفة قصاده وسانده ضهرها ع الحيط، بتبص جوه الحمام لدرجة انها ماحستش بدخولي، قربت منها عشان افهم مالها، صوت الولد خلاها اتنفضت وبصت ناحيتنا، قبل ما اسألها مالك، اتكلمت وكانت خايفة..

ـ الحمد لله انك رجعت بسرعة.

كُنت هرد اقولها اني ماخرجتش بره العمارة اصلا، بس كملت كلامها..

ـ دخلت الحمام بعد ما خرجت بثواني، فتحت حنفية الحوض عشان املا جردل مايه، فنزلت مايه سخنة جدا، فقفلتها بسرعة.. بس اتفتحت لوحدها، حاولت اقفلها ماعرفتش، وقتها عيني لمحت صورتي في المراية، بس ماكنتش انا، بخار الماية اللي عليها كان بيرسم خطوط ونقوش غريبة، خوفت ورجعت لورا عشان اخرج، وقتها حسيت اني اتخبطت في حد واقف ورايا، لفيت بسرعة ماكنش في حاجة، بس سمعت نفس صوت الهمس، فصرخت.. كهربة البيت اترعشت ومن بعدها بدأت تتكسر واحدة وراها التانية، احنا لازم نمشي من الشقة دي.

طبطبت على كتفها وحاولت اهديها، خدتها و قعدنا على اقرب كنبة، اتكلمت وقولتلها..

ـ هنزل بسرعة اجيب لمبات للشقة، عشان نعرف بكرة نلم حاجتنا.

بس رفضت نهائي اني اتحرك من جنبها، وفعلا.. اليوم ده نمنا كلنا في اوضة واحدة، او تقريبا هم اللي ناموا، اما انا بسبب القلق ماقدرتش انام، فضلت منور جنبي كشاف التليفون، وعيني متثبتة على صالة البيت، ما اعرفش بسبب الخوف وضلمة المكان، كنت شايف خيال بيتحرك وبيجري بسرعة، واضح انعكاسه بسبب نور الحمام، ولا ده فعلا حقيقي ومش تهيؤات.. حاولت اغمض عيني، بس اللي حصل مع صوت موج البحر، عاملين ميكس صوتي ينفع لفيلم رعب، لحد ما لمحت مراتي بتاخد نفسها بالعافيه، مرة واحدة قامت نص قومة مفزوعة، من بعدها صحي ابني الصغير بيصرخ، ما نطقتش غير بجملة واحدة وهي بتبص برا الاوضة “انا شوفت كابوس مرعب”.. ماحاولتش اعرفه، وهي ماحكيتش ايه اللي شافته، بعد دقايق من قعدة الصمت اللي كنا فيها الفجر أذن.. وقتها رجعت مراتي نيمت الولد ونامت، وانا كمان قدرت انام.

تاني يوم الصبح، كلمت صاحبي عشان اسأله ميعاد رجوعه، فأكدلي انه بكرة هيكون عندي، وعلى الاساس ده اتكلمت مع مراتي، اننا نصبر بس يوم كمان، بدل البهدلة بين الشقق، وافقت.. سيبتها مع الولاد بعد ما فتحت بلكونة الشقة، نزلت اشتريت لمبات جديدة وفطار، بعد ما رجعت كان الولاد صحيوا، اتبسط ان الامور كانت هادية، حتى ولادي كانوا ماسكين الكورة وبيلعبوا، الكورة اتحدفت جوه اوضة النوم، قامت بنتي عشان تجيبها، غابت لدقايق.. ساعتها انشغلت بصحيان ابني الصغير اللي جه يجري عليا، لمحت ابني “يحيى” قام من مكانه ورايح ناحية الحمام، وقف قصاده ثواني، بعدها دخل.. بعد دخوله، باب الحمام اترزع.. سمعت صوت ابني بيصرخ من جوه، قومت بسرعة وروحت عند الحمام، حاولت افتح الباب بس كأن في حد قافله من جوه، جت مراتي وبنتي على صوت صراخ يحيى، عافرت اضغط على الباب بكل قوتي لحد ما اتفتح، خرج ابني يجري من جوه، وقف يتنفض وهو بيبص على اخته شهيرة، نزلت على ركبتي وحضنته، جابت امه كوباية مايه فخدها من ايدها وشرب، اتكلم بصعوبة وكان بيتهته، قبل ما ينطق شاور على اخته..

ـ هي اللي ندهت عليا.

استغربت انا وامه وبصينا على اخته، برغم ان كلامه واضح يقصد مين، بس السؤال خرج على لساني تلقائي..

ـ هي مين؟

رد وقال..

ـ شهيرة، بعد ما صحي ايمن واتشغلت معاه، سمعت صوت جاي من ناحية الحمام، كان في حد بينده عليا، بصيت.. كانت شهيره ماسكة الكورة، شاورتلي وندهت عليا عشان اروحلها، قومت وروحت عندها.. وقفت قصادها وشاورتلي ادخل الحمام عشان نلعب، دخلت.. بس اول ما دخلت لمبة الحمام طفت، والباب اتقفل.

الكلام كان غريب ماعرفتش ارد عليه، السبب واضح.. شهيرة كانت في الاوضة مع امها، خرجت معاها لما سمعوا صراخه، من غير تردد بصيت لمراتي وقولتلها..

ـ ادخلي جهزي الشنط، هنزل اجهز العربية وارجعلكم عشان نمشي.

هي ما صدقت.. خدت الولاد ودخلت الاوضة تجهز الشنط، خرجت من الشقة ومنها للدور الاول، جه في بالي وقتها البواب، كان قاعد بره العمارة.. صبحت عليه وعزمت عليه بسيجارة، بعدها سألته..

ـ اسم الكريم ايه؟

رد عليا وهو بيشكرني على السيجارة..

ـ محسوبك عبد الكريم يا بيه.

ـ بقولك ايه يا عم عبد الكريم، الشقة اللي في الدور التالت، اللي أجرتها.. ماحدش سكن فيها قبل كده؟

سكت ثواني وبعدها قال..

ـ الكدب خيبة يا بيه، انا مسكت غفير من خمس سنين، بس اللي اعرفه عنها وسمعته من الغفير اللي قبلي، انا نادر لما حد بيأجرها، واللي بيدخلها ما بيكملش فيها غير سواد الليل، وتاني يوم بيلم حاجته ويسيبها، كلام في سرك.. اوعى تحكيه قصاد حد لسوق شقق العمارة يقف، السكان الدايمين، وكمان اللي بيتأجروا وقت المصيف، كانوا بيخافوا من الشقة دي والدور اللي فيها، لو صدف وحد بص من الشباك اللي في المنور، ووقعت عينه على شباك الحمام، كانوا بيشوفوا حد جوه، واحيانا خيال حد بيتحرك، ده غير الريحة اللي طالعه منه.. اعوذ بالله، جيفة كلب ميت.

سألته تاني عشان افهم منه اكتر..

ـ ايوه يعني السبب ايه؟.. حد اتقتل فيها مثلا وده عفريته؟

رد وهو بيخرج تليفونه من جيبه..

ـ اسمع يا بيه، انت باين عليك راجل محترم ووشك سمح، انا هجبلك الناهية في الموضوع ده، شكل الراجل البخيل صاحب الشقة، خزوقك في ايجار كبير.

كمل كلامه وهو بيتكلم في التليفون..

ـ ايوه يا حج “رجب”، حضرتك موجود في شقتك؟

سكت لثواني وبعدها قال..

ـ طيب عاوزك خمس دقايق في مدخل العمارة.

قفل المكالمة وسكت، بحركة ايده شاورلي استنى لحظات، بعد كام دقيقة باب الاساسنسير اتفتح، خرج منه راجل كبير في السن، وعلى ملامحه الوقار، قرب مننا وسلم، اتكلم عبد الكريم وعرفه عليا ودخل على طول في حوار الشقة، واللي فهمته من كلامه، ان الحج رجب ساكن قديم وبيصلي بالناس في الزاوية اللي جنب العمارة، بصلي الحج رجب وقال..

ـ الموضوع مش قصة عفريت ولا شبح قتيل، انا دخلت الشقة دي، ريحها مش حلو.. بسبب هجرانها لسنين، استوطنها مخلوقات مش من عالمنا.

قاطعت كلامه..

ـ تقصد الجن.

ـ ممكن ليه لا، الجن مخلوقات ربنا.. خرجوا من الحمام اللي بابه اتساب مفتوح، احتلوا الشقة بنظام وضع اليد، وللسبب ده مافيش ساكن بيعمر فيها، ما هو اي حد بيدخلها، بالنسبالهم دول محتلين جايين ياخدوا بيتهم وسكنهم، ودي حاجة مش هيقبلوا بيها ابدا، واضح كده انك جربت يا بشمهندس.

وقبل ما ارد عليه، سمعنا صرخة عالية جاية من فوق، جريت بسرعة لدرجة اني وقعت على درجات السلم، وصلت الدور اللي في الشقة، كانت مراتي واولادي واقفين بره الشقة وبابها مقفول، ماسألتش ايه اللي حصل، او مابقتش اتفاجئ.. وقتها كان وصل البواب والحج رجب عندي، جنبت اولادي وفتحت الباب، الشقة ضرب فيها زلزال مدمر، كل حاجة مش في مكانها، الكراسي واقعة والكنب متحرك لمكان تاني، فضل الحج رجب يستعيذ بالله، وعلى اثر استعاذته باب الحمام بقي يقفل ويفتح، شاورلي الم حاجتي واخرج بسرعة، وفعلا عملت كده.. بعد ما خلصت، خرجنا من الشقة وقفلنا بابها، تعب اليومين اللي قعدناهم في الشقة، بمجهود وشقا سنة، وده خلاني ماطلبش فلوسي من صاحب الشقة، ولغيت المصيف خالص.. مراتي نفسها وافقت على رأيي، ركبت العربية مع اولادي، ولفيت في اتجاه القاهرة.. ومن الوقت ده ختمت على تأشيرة اسكندرية بختم أحمر، مافكرتش لا انا ولا مراتي نروحها تاني.

بعد ما خلص المهندس كلامه، عذرته فعلا.. ماكنش عندي ولا عند غيري رد نقوله، هو كمان بص في ساعته واستأذن عشان يمشي، بعد ما مشي سهرتنا قصاد الشغل اتقفلت، او احنا نفسنا اتقفلنا، العمال كان بيضحكوا ويرغوا في حكاية المهندس، بيظهروا شجاعة مزيفة، والحقيقة انهم كانوا مرعبين، والدليل قصادي واضح.. اتلموا كلهم وناموا في اوضة واحدة، بحجة انهم هيكملوا سهرتهم مع بعض، واللي يضحك بقى، لما جه ناحيتي “سمعة” وقال بصوت واطي..

ـ بقولك ايه يا حسن، انا رايح الحمام، ما تيجي تطمن على الشبابيك مقفولة ولا لا.

من حظه السئ، مع هدوء المكان.. العمال سمعوا كلامه، الضحك اشتغل عليه، وقضينا باقي سهرتنا بين الخوف من صوت الهوا اللي بيخبط في الشباك، وبين التسلية على خوف سمعه من دخوله الحمام.

“تمت”

لمياء الكاتب